Düzdür, adətən xəstələr öz sağlamlıqlarından həkimə şikayət edirlər. Amma mən burda bir balaca yerdəyişmə etmək istəyirəm. Ölmürəm adətləri pozmaq üçün?!... Şikayətim sağlamlığımdan həkimlərə yox, həkimlərdən sizədir!

Axır vaxtlar bu həkimlərin əlindən dad eləyənlər lap çoxalıb, yeri gəlmişkən... Yəni bu məsələdə həmfikirlərimin sayı azlıq təşkil etmir. Son zamanlar eyni vaxtda eyni metrostansiyanı, eyni marşrutu paylaşdığım, küçədə, yolda rastıma çıxan, yanımdan ötüb keçən heç tanımadığım insanların dilindən bu cümləni yaman çox eşitməyə başlamışam (bəlkə də həmişə eşitmişəm, sadəcə fikir verməmişəm) : “İndiki zəmanədə xəstələndinsə, uzat əl- ayağını öl! Nə badə həkimlərin əlinə düşəsənaaa...” Adam belə bir şeyi 1 nəfərdən, uzağı 2 nəfərdən eşidər, daha hər yoldan ötəndən yox daaa... Deməli, torbada pişik olmasa da, axır nə isə var... Görəsən camaatın bu cümləni tez- tez, həm də bu cür aqressiya ilə dilinə gətirməsinin səbəbi nədir? Elə bu səbəbi arayıb tapmaq ümidilə balaca bir ekspertiza keçirməyi planlaşdırdım.

Çoxdandır bel ağrısından şikayətlənən bir qohumumu da götürüb düşdüm xəstəxanalarımızdan birinin qapısına... O qapı sənin, bu qapı mənim, o həkim sənin, bu həkim mənim... Artıq o vaxtdan 6 ay keçməsinə baxmayaraq, qohumumun sağlamlığı məsələsində dəyişən bir şey yoxdur. Bel ağrısı olduğu kimi qalıb, hətta bir qədər irəliləyib də! Amma başqa dəyişikliklər var: Məsələn, həmin insan bu qədər get- gəldən sonra əməllibaşlı arıqlayıb. Həm özü, həm də cibi... Nə isə, təəssüfdolu xəstə ekspertizam məni aşağıdakı nəticələrə gəlməyə məcbur edib:

Əvvəla, indiki həkimlərin çoxu öz sənətini heç də lazımınca bilmir. Səbəb isə ayrı mövzudur, həm də ki, hamıya bəlli bir mövzu: Korrupsiya!

Düzdür, savadlı həkimlərimiz də az deyil. Di gəl ki, onların əksəriyyəti də ancaq öz mənafeyini güdür, xəstənin sağalması məqsədi onun məqsədləri arasında ən sonuncu yerdə durur, təəssüflər olsun... Onlar öz xəstələrini mümkün ən rahat, ən ucuz və ən sərfəli üsulla tez bir zamanda müalicə edib evə göndərməyi bacardıqları halda, “klient”i əlindən çıxmasın deyə, onu aylarla lazımsız yerə get- gələ salırlar. Yararsız iynə- dərmanlarla “müalicə” aparırlar.

Həmin tip həkimlər hər hansı bir apteklə, rentgen və ya diaqnoztika mərkəzləri ilə müqavilə bağlayır və bundan yaxşı “daş baş”ı çıxdığına görə, öz xəstəsini yeri gəldi- gəlmədi həmin diaqnoztika və ya rentgen mərkəzinə göndərirlər. Reseptə isə xəstənin müalicəsinə heç də dəxli olmayan, amma eyni zamanda da heç bir zərəri olmayan dərmanlar, vitaminlər yazmaqla apteklə olan müqavilənin də şərtlərini yerinə yetirmiş olurlar. Ara yerdə də xəstənin cibi boşalır. Həm də tamam boş yerə! Çünki, bu halda müalicənin aparılıb- aparılmamasının heç bir fərqi olmur. Hələ mənasız yerə vaxt itirdiyindən xəstənin vəziyyəti bir qədər pisləşir də!

Məhəmməd Peyğəmbər buyurub ki, 5 şey gəlmədən öncə 5 şeyin qədrini bil: Qocalıq gəlib çatmadan əvvəl gəncliyinin, xəstələnmədən əvvəl səhhətinin, yoxsullaşmadan əvvəl zənginliyinin, məşğuliyyət gəlmədən öncə boş vaxtının və ölüm gəlmədən əvvəl həyatının! Biz səhhətimiz başda olmaqla heç nəyimizin qədrini bilmirik! İngiltərə kimi ölkələrdə xərçəng xəstəliyinə tutulmuş hər hansı bir insan, artıq xəstəliyinin 1- ci dövründən müalicə almağa başlayır. Azərbaycan kimi dövlətlərdə isə, xərçəngə yoluxmuş insanın xəstəliyi hələ onun 4- cü mərhələsində aşkarlanır, qaldı müalicəyə başlamağı. Niyə? Çünki, ingilislər hər 6 aydan bir lazım oldu- olmadı müayinədən keçdikləri halda, azərbaycanlılar yalnız ölümcül xəstə vəziyyətinə gəlib çatdıqdan sonra müayinə olunmağı düşünürlər. Amma bəzi həkimlərimizin bu hərəkətlərindən sonra, xəstəliyin 1- ci, yaxud 4- cü dövründə aşkarlanmağının da bir mənası qalmır, düzü... Onsuz da onlarınkı müalicə yox, ancaq pul qopartmaqdır...

Həmin həkimlərimizin iyrənc əməllərindən səhərdən axşama qədər danışmaq olar. Lakin onsuz da 2 adamından biri xəstə olan millətimi bu bəd xəbərlərlə bir az da mən azara salmaq istəmirəm. Sadəcə, həkimlərə “STOP” deməyin vaxtı həqiqətən çatıb. İnsafınız olsun, əziz həkimlər, gördüyünüz əməllər heç də insanlıqdan deyil axı...

      
Bu xəbər 4634 dəfə oxunub.