Əmlak Məsələləri Dövlət Komitəsi qarşısında qoyulmuş vəzifələrin icrası, o cümlədən dövlət əmlakının idarə edilməsi və özəlləşdirilməsi, müəssisələrin restrukturizasiyası və sağlamlaşdırılması, daşınmaz əmlaka dair hüquqların dövlət qeydiyyatına alınması, daşınmaz əmlakın dövlət reyestrinin aparılması və vahid kadastrın tərtib edilməsi, habelə ünvan reyestrinin aparılması sahələrində işlərin daha da təkmilləşdirilməsi ilə bağlı müvafiq tədbirlər həyata keçirir. Belə ki, komitə inkişaf etmiş ölkələrin bu sahədə təcrübələrinin öyrənilməsi məqsədi ilə beynəlxalq qurumlarla əməkdaşlıq və təcrübə mübadiləsinin həyata keçirilməsi istiqamətində fəaliyyətini davam etdirir.

            Bu məqsədlə, Əmlak Məsələləri Dövlət Komitəsi tərəfindən 25 sentyabr 2009-cu il tarixində Bakıda Almaniya Texniki Əməkdaşlıq Cəmiyyəti (GTZ) ilə əməkdaşlıq çərçivəsində “Almaniyada dövlətin daşınmaz əmlakının idarə olunması və dəyərləndirilməsi” mövzusunda seminar keçirilmişdir. Tədbirdə almaniyalı ekspertlər, komitənin mərkəzi aparatının, komitənin yanında Daşınmaz Əmlakın Dövlət  Reyestri Xidmətinin, Daşınmaz Əmlakın Kadastrı və Texniki İnventarlaşdırma Mərkəzinin əməkdaşları iştirak etmişlər.

Seminarda GTZ-in layihə rəhbəri Vulf Şmider və ekspert cənab Manfred Lange (Daşınmaz əmlak üzrə Federal Agentliyin əməkdaşı) məruzə ilə çıxış etmişlər. Xarici ekspertlər ilk olaraq Almaniya Federativ Respublikasının Daşınmaz Əmlak üzrə Federal Agentliyin fəaliyyəti ilə bağlı iştirakçıları tanış etmişlər. Tədbirdə xarici ekspertlər tərəfindən Almaniyada və digər avropa ölkələrində daşınmaz əmlakın növləri, onun idarə olunması, bu sahədə mövcud olan marketinq alətlərinin xüsusiyyətləri barədə məlumat verilmişdir. Əcnəbi ekspertlər torpaq sahələrinin əldə olunması, satışı və bu sahədə mövcud olan beynəlxalq qanunvericiliklə bağlı da məruzə etmişlər.

Tədbir çərçivəsində bu sahədə mövcud olan Almaniya təcrübəsinin Azərbaycanda tətbiq edilməsi imkanları barədə fikir mübadiləsi aparılmış, seminar iştirakçılarını maraqlandıran suallar cavablandırılmışdır.

Bununla yanaşı, komitə tərəfindən Azərbaycan Respublikası Prezidentinin 6 iyun 2007-ci il tarixli Fərmanı ilə təsdiq edilmiş “Azərbaycan Respublikasında dövlət əmlakının idarə edilməsinin təkmilləşdirilməsi üzrə Dövlət Proqramına” uyğun olaraq dövlət müəssisələrində restrukturizasiya və sağlamlaşdırma tədbirlərinin, habelə institusional dəyişikliklərin aparılması istiqamətində beynəlxalq təcrübənin öyrənilməsi ilə bağlı da işlər davam etdirilir.

Bu məqsədlə,  24 sentyabr 2009-cu il tarixində Şəki şəhərində Almaniya Texniki Əməkdaşlıq Cəmiyyətinin (GTZ) dəstəyi ilə «Dövlət müəssisələrinin restrukturizasiyası: Almaniya təcrübəsi» mövzusunda seminar təşkil edilmişdir. Seminarda komitənin ərazi şöbələrin əməkdaşları iştirak etmişlər.

GTZ-in ekspertləri Almaniyanın və digər avropa ölkələrinin dövlət müəssisələrində, o cümlədən infrastruktur sahələrində restrukturizasiya, şirkətlərdə institusional yeniləşmə və fəaliyyətinin təşkili ilə bağlı iştirakçılara məlumatlar vermişlər. Xarici ekspertlər kommunal xidmətlər, enerji, qaz və mərkəzləşdirilmiş istilik təminatı, su təchizatı, tullantıların kənarlaşdırılması sahələrində məruzə ilə çıxış etmişlər. Komitə əməkdaşlarına qeyd olunan sahələrdə mövcud olan xidmətlər üzrə qiymət səviyyələri və kommunal təchizat üzrə orta xərclər barədə də məlumat verilmişdir. Sonra isə müvafiq məsələlər üzrə müzakirələr aparılmışdır.

Hər iki seminarın yekununda iştirakçılara sertifikatlar verilmişdir.

Komitə tərəfindən gələcəkdə də dövlət müəssisələrinin idarə edilməsi, restrukturizasiyası və sağlamlaşdırılması, həmçinin daşınmaz əmlakın dövlət reyestrininin və vahid kadastrının, habelə ünvan reyestrinin aparılması, daşınmaz əmlakın qiymətləndirilməsi sahəsində inkişaf etmiş ölkələrin təcrübəsinin öyrənilməsi məqsədilə beynəlxalq əməkdaşlıq əlaqələri davam etdiriləcəkdir.

      
Bu xəbər 1888 dəfə oxunub.