Ötən gün DAK (Dünya Azərbaycanlıları Konqresinin) Gənclər Təşkilatının sədri Seymur Həsənli, fəalları Cavid Barış və Ayxan Mehdizadə Günaz TV-də tanınmış türkoloq-alim Ramiz Əsgərin proqramında qonaq qismində iştirak ediblər.

Verilişin mövzusu Türk Birliyi yolunda quzeyli-güneyli Azərbaycan idi. Türkün tarixi birliyi və onun sonradan müxtəlif qollara parçalanması haqqında məlumat verən aparıcı Ramiz bəy ilk sözü Seymur Həsənliyə verdi. Seymur bəy Türkün parçalanmasında və bugün birləşməsində düşmənlərin rolundan danışaraq tarixən edilmiş səhvlərə də toxundu: “Əmir Teymurla Bəyazid, Şah İsmayılla Sultan Səlim toqquşmasaydı, bugün dünya necə olardı? Bunun həmişə fərqində olan düşmənlər müxtəlif oyunlar qurmuş və çox təəssüflər olsun ki, başçılar da bu oyunu oynamaqla dünya türklərini mövcud duruma gətirib çıxarmışlar. Amma bizlər tarixdən bəhrələnib həmin səhvləri təkrarlamamalıyıq.”

Digər iştirakçı Cavid Barış isə Ramiz bəyin dövlətin güneyə dəstəyi fikrinə münasibət bildirdi: “Dövlət və onu təmsil edən mövcud hakimiyyət heç bir zaman güneyə açıq dəstək verə bilməz. Çünki dövlətlərarası münasibətlər və hüquq prinsipi var. Baxmayaraq ki, İran adlanan məmləkət dəfələrlə bu prinsipi pozub. Çünki Azərbaycanın varlığını qəbul etmir və onu hər yolla təxribata çəkməyə çalışır.”

Ayxan Mehdizadə təhsil aldığı Bakı Dövlət Universitetində milli şüurun inkişafından danışaraq, hər bir tələbənin Azərbaycan ərazilərinin mövcud sərhədlər çərçivəsində olmadığını bildiyini xatırlatdı. “Tələbə olaraq daim milli mücadilənin önündəyik və bundan sonra da olacağıq”

Veriliş canlı diskussiya şəklində davam etdi.

Yeni Nəfəs İ.M.

      
Bu xəbər 1502 dəfə oxunub.